Das isch mi zweits Buech vom Pedro Lenz und es isch für mi genau so toll gsi, wie Primitivo, obwohl Primitivo nomol ganz e biz besser gsi isch! Mi Vater kunnt usem Ämmitau und wenni em Pedro Lenz sini Büecher lies, isch es e biz wie heimko, obwohl ich in Basel ufgwachse bi und dorum nodürlich ganz e andere Dialäkt ha.

„Bi dere Gschicht gohts um dr Peter Wingeier resp. dr Theophil Romang wo us dr Schwiz usgwanderet isch und in Argentinie si Glück suecht. Inspiriert vonere wohre Gschicht wird s Ganze us dr Sicht vom Sohn vom Romang verzellt.“

Klappentext

Ich has sehr unterhaltsam und witzig gfunde. Es isch nid die grössti und usgfallensti Gschicht aber vilicht grad wäge däm isch es guet gsi und hed e paar schöni Gedanke brocht. Halt e Gschicht usem Läbe, wie das bim Pedro Lenz amel eso isch. Empfählig für alli wo gärn Mundart läse und au scho ans Uswandere dänkt hän.

Rating: ⭐️⭐️⭐️⭐️